Það er þörf á Gunnari í Krossinum
Ég hef nýverið varla getað annað en pælt í tölvuveirum, næstum allir sem nota tölvur og internet hafa orðið varir við faraldur síðustu daga (1, 2, 3). Mér var að detta í hug einn maður sem gæti hjálpað okkur við að minnka hættuna á að þetta endurtaki sig:
Gunnar í Krossinum.
Pæliði aðeins í því.
Auðveldasta leiðin til að losna við þessar hvimleiðu tölvuveirur er sú sem ég nota heima hjá mér; Ekki nota vörur frá Microsoft. Ég fæ enga veirusýkingu í mína tölvu vegna þess að langflestar veirur leggjast bara á windows. Þeir sem nota windows eru þessvegna í áhættuhóp vegna lífstíls síns.
Hommar voru einu sinni aðaláhættuhópurinn gagnvart annari og mun hættulegri veiru, eyðniveirunni. Gunnar í Krossinum ákvað af sinni alkunnu góðmennsku að réttast væri að af-homma þessa menn. Hann hefur sagt að það hafi virkað hjá sér og að hann hafi náð að af-homma nokkra, og þá má draga þá ályktun að þá væru þeir svo sannarlega í minni hættu að smitast af eyðni.
Fyrst að Gunnar býr yfir þessari tækni þá ættum við að fá hann til að aðlaga hana að núverandi ástandi; það þarf að af-Windowsa fólk. Þannig myndi grundvellinum fyrir töluveirusýkingum vera eytt.
Þú sem þetta lest: Ef þú notar Windows, hættu því. Láttu okkur af-Windowsa þig. Það er til annar og heilbrigðari lífstíll, bæði fyrir þig og þína tölvu. Prófaðu t.d. Linux eða Macintosh.